وهذه القصيدة قالها خلف بن ثاني الضبيب رحمه الله يتوجد على الحل والترحال وحيات البادية يسند على عبدالله بن دهيمش بن عبار : 1

يا الـلـه يـا الـلي خـالـق بـر وابحـور *** ومـقـسـمـه مـا بـيـن بـرد وحـرارة
يا الـلي خلقت أيام وسنين واشهـور *** وكـلــن يـدور مـحـددن لـه مـسـاره
تفرج لقلب من غـثـا الوقـت مقهـور *** يــبـي الـبـداوة مـا يـريـد الحـضارة
يـوم السلف يمشي ويتلـيـه مظهـور *** وبيت الشعـر بالبـر يسوى العـمارة
غـصب عـلينـا نسكـن الدار والـدور *** الـدور دار وسـامـك الـعــرش اداره
من عـقب ما كنا عـلى شمخ الخـور *** وكـلـن عـلى كـيفـه يعـسف امهـاره
قلبي ياأبو مشعل مع البدو مسحـور *** وعـزي لمن مثـلي سكن لـه بحـاره
القلب ما هو يا أبـن الأجواد مسرور *** تـقــل جـهــل قـلـبـي يـدّور دمـــاره
ماحب أنا الـلي لا مشى مشيه حدور *** قـلـبي يـحـب الـلي صعـوداً مسـاره
حيث الردي دايم عن الطيب مقصور *** بـالـمـرجـله دايـم قـصيرة أشـبـاره
إلى هـرج كنه من الغـوش مسطـور *** وكـل العـرب تعرف خوافي أسراره
أعرف ترى يامسندي شاهـد الـزور *** مثـل الحنيش الـلي بوسـط الخبـاره
وأحذر ترى مـن عـال يـأتيه ممرور *** والـنـار تـقــدح بـالـبـدايـة شـــرارة
ولا كـل رجـل يـفتهـم يعـطي الشـور *** بعـض العـرب حذراك تأخذ أشواره
خطو الرجل علمه مثل ساطع النـور *** يـرشـدك للمعـروف بأحسن عـبارة
وخطوالرجل دايم من الكبـر مغـرور *** مـره يصـيب ونـوب يخطي الإشارة
وخطوالرجـل يالقـرم خايب ومثبـور *** مــا عــنـده حـمـيـا ولا بـه نـغـــاره
وخطو الرجـل حاضر وعـده بلاهور *** لــو تـلـتـزم لـه مــا بـكـبـده مـرارة
واللي يحقـر الناس بـالناس محقـور *** وكـلـن عـلى مـعـنـاه يصـدر قـراره

* قال عبدالله بن دهيمش بن عبار هذه القصيدة رداً على قصيدة خلف بن ثاني الضبيب رحمه الله وبها يرى أن عصر الحضارة أفضل من عصر البداوة : 2

يا أبـو عزيـز الـقاف جاني ومشكور *** وأفـهـم هـدف معـناك يا ريف جاره
رحـبـت بالمكتوب بحساس وشعـور *** مرسل من الـلي سلـم الأجواد كـاره
يا أبـو عـزيـز العبـد منهـي ومأمور *** والـلي مضى هيهـات تلحـق قـراره
كانه طرأ لـك يا خلف دور وعـصور *** عـصر بـه الفارس يـنول الصـدارة
تذكـر زمان السيف والسرج والكور *** ومـن زعـل يبـزع ما يطب النظـارة
عصرالنضى والخيل والقود والخور *** يـوم تـغـيـر ويــوم تـاتـيـك غــــاره
يـوم تعود مـن الطلب وأنـت منصور *** ويـوم عـلى ما قيـل صيحة عـزارة
وش عاد لـو بالروض نـوار وزهور *** وقـت الـربـيع وثـم يـذبـل خـضـاره
وش عاد لو تصعد على نايف القـور *** وتـمشي طليـق بكل سـوح وفقـاره
الـدور الأول يـا خلف شـر واشـرور *** دايـم تحـفـظ مـثـل راعـي الخـفـارة
مـن فضل ربي دورنا بأحسن الـدور *** الـيـوم عـصـر الهنـدسة والـمهـارة
حـنـا سكـنـا فـي بـنـايـات واقـصـور *** والـليـل يـشبـه يـا السنـافـي نهـاره
الكابرس والجمس والفـورد والمور *** الـلـي ركـبـهـن يـوصـلـنـه ديــــاره
والما القراح اللي يجي لك بماصـور *** أخيـر مـن غـرف العـدود بغـضـارة
وإلـى أشتكيت الباس يـأتيـك دكتـور *** أطـيـب مـن العـطـبـه تـغـثـك بـنـاره
صيف البراري يـا خلـف تـقل تـنّـور *** مـن حـرهـــا عـدك عـلـى نـار واره
وصيف المدن تكييف كنه هوا صور *** يـنعـشـك نـسنـاسـه يـهـب بـغـزارة
والـلي تبـيهـم كلهـم عـندك أحضـور *** أمـا تـجـيـهـم أو يـجـــونـك زيــاره
ولـو لـك صديـق صار بكـوالا لمبور *** عــده مـعـك دايـم تـجي لـك أخبـاره
هنيـت الـلي مـرتـاح والحـال مستـور *** والمسعـد الـلي يصـلح الـلـه بـذاره
وأفطن ترى بالناس سمقان وصقور *** ولا كـل طـيــر تـنـجـبـه لـلـصـقـاره
والخلق فيهـا بساس وفهود وانمور *** لكـن طـوال الخيـل تحـمي اقـصـاره
والناس مبطي بيـن خامل ومشهـور *** ومـن لا حـفـظ دينـه حياتـه خساره
لا تواخـذ الهـلبـاج يـا القـرم معـذور *** لـولا شـعـر دقــنـه تـعــده سـمــاره
عـليك بـاللي مـن الـرجاجيـل منعـور *** إلـى قـلـت الحـيلات حـطـه أذخـاره
وصلوا على اللي باسمه الدين منشور *** المصطـفى بالحـق جـاب البـشـاره