قصائد وبحور (نبطي)

صخري



تقول الراويه




تقـول الراويـه: وتذيع الاخبار
حكاوي عن زمـن عافـوه ناسـه

تقصّ تقول : به فارس ومغـوار
حكيـم ومتـزن عنـده فـراسـه

ركب راسه تحـدى كـل الاخطـار
لجل عيـن المعنـى لجـل راسـه

ولعيونـه كتـب منشـور ثــوّار
ولعيونـه درس فـن السيـاسـه

وقف بصمود قـاوم سـادة الـدار
سقاهـم طلسـم الاحرار كاسـه

عطاهم درس في الاصرار ماصـار
علـي نهـج الدماثـه والكياسـه

وقالوا عـن هذاك الحر كـرّار
وقالوا عن كريـم الأصـل ماسـه

وبعض القوم قالـوا صايبـه زار
وزادوا بهرجهـم فيـه الحماسـه

ولامه في العواذل شخـص ثرثـار
صبر ثم اكتئـب ثـم قـام داسـه

واقنعهم بعـد ماشافـوا الاصـرار
وقالوا عنه صـادق فـي حواسـه

وراح لصاحبـه يعطيـه الاخبـار
بيـدّّه رايتـه وتـاجـه بـراسـه

رماه برمية(ن) مـن غيـر انـذار
بعد ذاك التعـب صاحبـه حاسـه

وقف ساعه ونفض عن وجهه غْبار
وبعيونـه ظهـر لـون التعاسـه

رجع للدار مصـدوم(ن) ومنهار
وواسـوه القرايـب شـدوا باسـه

وجاله صاحبه مـن بعـد ماجـار
يقدم له عذر يوصـف لـه ياسـه

ولكـن مايفيـد اليـوم اعــذار
ولايمكـن يـرد عهـد الونـاسـه

وحتى لو يبـي يرجـع للاخطـار
فقد مـن يدعمـه بعـد انتكاسـه

ولا يمكن يغيـر شـي لـو طـار
هله شالوه مـن عـرش الرئاسـه


وسلامتكم