أستاذتي الغاليه
ناديه
:
دايم صح
ممكن تقطعين لي الشطر بدايم ؟
لاهنتي
بانتظارك
أستاذتي الغاليه
ناديه
:
دايم صح
ممكن تقطعين لي الشطر بدايم ؟
لاهنتي
بانتظارك
مراحب
من عيوني
تعرف ان التقطيع سمعي وكما ننطق
اذا قلنا البيت بكلمة (دوم)
ألا ياهالزمن وش بك تخرّب دوم افراحي
الا3 ياهز4 زمن3 وشبك4 تخر3 ربدو4 م أف3 راحي4
اذا قلنا البيت بكلمة (دايم)
ألا ياهالزمن وش بك تخرّب دايم افراحي
الا3 ياهز4 زمن3 وش بك4 تخر3 رب دا4 يمف3 راحي 4
طبعا لاننطق الالف في كلمه (افراحي)
ودمت بخير
ربي يسلم عيونك استاذتي الغاليه
مشكوره الله لايحرمني منك
لكن السؤال هو أليست الهمزة في كلمة أفراحي همزة قطع
كيف تختفي في التقطيع وهي ظاهرة ؟
هذا قصيدة جديدة لي
على البحر البسيط :
وتفعيلات البحر هي :
مستفعلن فاعلن مستفعلن فعلن = 4 3 2 3 4 3 4
عسى أن تحظى ولو بشيء يسير على إعجابكم
أقووول :
معقول يعني كذا انته تخلّيني !!!=وتغيب عنّي ولاتشتاق لوصالي
في ذمّتك ما سأل قلبك أنا ويني ؟؟؟=أو صاح في داخلك مشتاق للغالي
شكلك نسيت الهوى وانّك مُنَى عيني=وانّي وهبتك خفوقي يابري حالي
ياقوّ قلبك وانا قلبي معنّيني=مايمرّ يومٍ إلا وانت في بالي
ياساكن الرّوح اقطف من بساتيني=وارفق ترفّق بغصنٍ ليّنٍ دالي
هو بين يدّك ويبغى بس ترويني=من نبع جوفك من التّحنان يالخالي
يامورّد الخد يابو طرف مشقيني=اسهرت طرفي اغنّي فيك موّالي
لنّك حياتي ولاغيرك ثوى فيني=ماغير زولك قسم بالله يحلالي
ارجوك تكفى ابي منّك تسلّيني=ان كان باقي فصدرك شيءٍ حيالي
من جور وقتي طلبتك بسّ واسيني=لنّك بعيني ترى والله آمالي
ياما سقيتك حلو وصلي وتسقيني=مرّ الصّدود وتغض الطرف عن جالي
ياما وياما عزمتك بين جفنيني=شوقي قدوعك ولهفي مالي دلالي
مشتاق اشوفك واروي منك انا عيني=وتذوق منّي بطعم الحب فنجالي
عوّد بسرعه وتكفى لا تبكيني = لا لا تطوّل تشمّت بيّ عذّالي
وسلامتكم
ومانستغني عن أي ملاحظة منكم أساتذتي الكرام
ودّي
أستاذتي ناديه
أين أنتِ ؟
ياقـوّ قلبـك وانـا قلبـي معنّينـي
مايمرّ يـومٍ إلا وانـت فـي بالـي
وهذا هو تقطيعي لأحد الأبيات /
يا 2 قو 2 وقل 3 بك 2 ونا 3 قل 2 بي 2 معن 3 ني 2 ني
مي 2 مر 2 ريو 3 من 2 إلا 3 ون 2 تِفي 3 با 2 لي 2
مراحب
صح السانك اخوي حسين قصيده متكامله وزن ومعنى وقاف وصور جميله
ويعطيك ربي العافيه
والى الامام
أستاذتي الغاليه
ناديه
عندي سؤال
ماهي البحور النّبطية التي يجوز فيها اهمال القافية ؟
وهل يصح مثلاً لو كتبت قصيدة وخليت قافيتها
موحدة لكن مو بحرفين بحركة الحرف ماقبل الاخير والحرف الاخير
مثال :
لو كانت القافية هالكلمات
زَل ، هَل ، مَل
هل تصح كقافية وتصبح موحدة ؟
اتمنى منك استاذتي
افادتي افادة قويّه حول القافيه
بشكل عام
بانتظارك استاتذي الغاليه
أخي حسين
نيابة عن الأستاذة ناديه،
أصناف القافية في النبطي ثلاثة تتفق مع أول ثلاثة أصناف في قافية الفصيح على الرابط :
http://alarood.googlepages.com/r8.htm
1- دي قْ ...ري قْ .... 2ه
يقظة طاحتْ بأحلام الكرى ... وتولّى الليلُ والليلُ صديقْ
وإذا النور نذيرٌ طالعٌ ... وإذا الفجر مطلٌ كالحريق
2 - نا حي ....با حي .... 22
عادَت أَغاني العُرسِ رَجعَ نُواحِ .... وَنُعيتِ بَينَ مَعالِمِ الأَفراحِ
كُفِّنتِ في لَيلِ الزَفافِ بِثَوبِه ...ِ وَدُفِنتِ عِندَ تَبَلُّجِ الإِصباحِ
3 - دا قِ ها ...وا قِ ها .... 212
آهاً على بغدادها وعراقها .... وَظِبائها والسحر في أحداقِها
وَمجالها عند الفراتِ بأوج.... تَبدو أهلّتها على أطواقها
هذه الخطوط العريضة ولا تغني عن الإحاطة بالتفاصيل التي تجدها على الرابط المذكور.
صبـــــــــــــــــاح الورد استاذ خشان
يعطيك ربي العافيه
وشكرا للجواب الشافي
استمتعت بالابيات .. رحم الله قائلها وسلمت يداك
ودمت بخير
سأجرب ماقلته أستاذي على قصيدتي أعلاه
معقول يعني كذا انتـه تخلّينـي !!!
وتغيب عنّـي ولاتشتـاق لوصالـي
في ذمّتك ما سأل قلبك أنا ويني ؟؟؟
أو صاح في داخلك مشتـاق للغالـي
قافية الصدر للبيت الأول = تِ خَلْ لِ ي نِ ي = 2 2
قافية الصدر للبيت الثاني = وِ ي نِ ي = 2 2
قافية العجز للبيت الأول = صَ ا لِ ي = 2 2
قافية العجز للبيت الثاني = غَ ا لِ ي = 2 2
والروي في القصيدة هو حرف اللام
أليس كذلك أستاذي
وإن كان صحيحاً ذلك فيبدو لي أن بحر القصيدة لهُ تأثير على نوع القافية
لأنني هنا كتبت القصيدة على البحر البسيط
وآخر تفعيله في هذا البحر هي فِعْلُنْ
ولذلك أصبحت القافية على
هذا المنوال 2 2
هذا ما اعتقده وماوصلت إليه
وإن كنتُ لستُ على صواب
فيسعدني تصويبك
ومزيد توضيحك
أستاذي
خشّان
كل الود
حُسين
التعديل الأخير تم بواسطة ناديه حسين ; 04-29-2009 الساعة 07:11 AM
أستاذتي الغاليه
ناديه
:
الله يجزاس ألف خير
على هالمجهود الطيب
وبإذن الله سأكتب على البحر الهلالي
وبانتظار موضوعاتك أستاذتي
حول القافية
لنتزود من علمك النّير
وثقافتك العاليه في الشعر النّبطي
كل الود
حسين
الله يسلمك يا ربّ
قدها و قدود إن شاء الله وانتي استاذه
وبامكانك بلورتها وربي يوفقك إن شاء الله
واحلى شيء انها فطريه وعلى السليقه الله يزيدك يا ربّ
ويوفقك استاذتي الغاليه
ودّي
أستاذتي الغالية ناديه
.
ساشتكي البدر بمواويلي
وانثر اشواقي على ضيّه
آه وجد ٍ هدّ لي حيلي
والهوى فتاك يا بنيّه
الصبر مر شرى الخيلي
والهجر نار اشعلت فيّه
هايم ٍ في الود يحليلي
ليت قلبك يعطف شويّه
ااشتكي البدر بمواويلي = اش تِكِل بد رب موا وي لي = 2 3 2 2 3 2 2
وانثر اشواقي على ضيّه = ون ثرش وا قي على ضي يه = 2 3 2 2 3 2 2
آه وجد ٍ هدّ لي حيلي = أا هـ وج دن هد دلي حي لي = 2 3 2 2 3 2 2
والهوى فتاك يا بنيّه = ول هوى فت تا كيب ني يه = 2 3 2 2 3 2 2
فتصبح تفعيلات البيت هي
2 3 2 2 3 2 2
سألتك في موضوع بحر المديد
وكانت إجابتك أن هذا الوزن هو وزن بحر الرمل
لدي كذلك أبيات أخرى
ولا أدري ماهو بحرها وأظنه على الرمل
والله أعلم
لي صديق بالغلا قدره .. جليل
غالي عندي على طول الزمان
في تواصيفه أبد ماله .. مثيل
فيه طيبه قلب مع زود الحنان
لاشحيح النفس ولادمه .. ثقيل
غصب عني صارله قدر ومكان
مستحيل ألقى مثيله .. مستحيل
الصديق اللي على الغالين كان
لي 2 صدي 3 قن 2 بل 2 غلا 3 قد 2 ره 2 جلي 3 = 2 3 2 2 3 2 2 3
غا 2 لين 3 عن 2 دي 2 على 3 طو 2 لز 2 زمان 3 = 2 3 2 2 3 2 2 3
في 2 توا 3 صي 2 فه 2 أبد 3 ما 2 له 2 مثيل 3 = 2 3 2 2 3 2 2 3
في 2 هطي 3 بة 2 قل 2 بمع 3 زو 2 دل 2 حنان 3 = 2 3 2 2 3 2 2 3
بانتظارك استاذتي
لتخبريني
واريد ان تدلين على طريقة جيده
لمعرفة بحر اي قصيدة عندما
اقوم بتقطيعها
لأنني لا احب ان احصر نفسي
وكتاباتي في بحور معينه دون اخرى
ودي لك استاذتي الغاليه
يسبق شكري و تقديري
يا عتيم الليل محبوبي قِسى=غيّر النّيّات قلبي ماهقى
كم تناساني وطيفه مانسى=ساقين قلبي وخلّي ماسقى
له جمعت الشوق حزّات المسا=انتظر ميعاد وصله واللقا
ضامين شوفه وقلبي احتسى=منه طعناتٍ وصدّات وشقا
حابسن دمعي واردد ياعسى=والحقيقه واضحه وضح النقى
جاءني مكلوم مملوءً اسى=ثمّ زحت الهمّ عنه مابقى
له غزلت الحب ثوباً واكتسى=أجمل التّحنان منّي وارتقى
في خفوقٍ صادقن مادنِّسى=طاهرن عذّبن كريم مشرقا
حيّر قليبي معاه ولا رسى=صرت انا والهم بالحيل رفقا
وانتهى الترداد وانبلعت عسى=جفّن دموعي ولاجا للـ / لقا
صار ناوي يذبح القلب بقسى=ناوين ذلّي ويبغى لي شقا
من صميم القلب يانذل تخسا=رح عسى عمرك جفافٍ مانسقى
رح وربّي عالمٍ بامر المسا=يوم خنت الوعد والوعد بلقى
السلام عليكم ورحمة الله وبركاته
.
استاذتي ناديه
استوقفتني ابيات لاحد الشعراء
جميله بس لما قطعتها طلع لي بحرها البسيط
والشاعر مهمل القافيه في الصدر والعجز موحده
وهذا على حد علمي وبعد اجابتك لما سألتك
ان الاهمال في قافية الصدر بس لصخري و الهلالي
هذي هي الابيات
يالهاجس اقرب دعاك اليوم لـي داعـي
اقرب وهات الجزال اشكـال وانواعـي
حضر جيوشك وصف الجنـد يالهاجـس
وانا علي احظر اوراقـي مـع ايراعـي
قال انت شاعر وانا تحت امرك وطوعك
اضرب بحور القصيد وغوص للقاعـي
واستخرج مـن البحـر دره ومرجانـه
وافتل بيـوت القصيـد بفـن وابداعـي
يل 2 ها 2 جسق 3 رب 2 دعا 3 كل 2 يو 2 ملي 3 دا 2 عي 2
اق 2 رب 2 وها 3 تل 2 جزا 3 لش 2 كا 2 لون 3 وا 2 عي 2
= 2 2 3 2 3 2 2 3 2 2
مستفعلن فاعلن مستفعلن فعلن
وهذي تفعيلات بحر البسيط
بانتظار تعليقك استاذتي الكريمة
.
محبتي
استاذه ناديه
وينك
؟؟؟
مرحبا اخوي حسين
بحرها البسيط او الهجيني الطويل
صح السان الشاعر
هنا استخدم الشاعر طريقه الشعر الفصيح
يجوز الاستخدام بهذي الطريقه
اول بيت نفس القوافي ويسترسل بباقي القصيده بنفس القافيه لباقي الابيات
قصدت انه لايمكن الهلالي يصير غير بهذي الطريقه
عشان يكون هلالي ولو توحدت القوافي بيصير منكوس على طوال
لكن هنا الطريقه هذي ماتغير البحر
احتمال ماعرفت اعبر بوقتها
حددلي وين كتبت هالكلام عشان اصلح المعلومه
وفيه عده اساليب لطرق كل البحور ويبقى البحر نفس البحر مثال
لنفس القصيده لو كتبت بهذا الشكل
يالهاجس اقرب دعاك اليوم لـي داعـي
اقرب وهات الجزال اشكـال وانواعـي
وانا علي احظر اوراقـي مـع ايراعـي
قال انت شاعر وانا تحت امرك وطوعك
ويسترسل بقوافي للمروبع ويوحد القوافي وينهي بنفس قافيه الشطر الاخير بالاول
....................................عالي
....................................حالي
................................شالي
.................................جوعك
حاولت اقرب الفكره
وربي يوفقك
واسفه على التأخير
استاذتي الغاليه ناديه
.
انا اللي اقصده والمعروف عن أي بحر من بحور النبطي
غير بحر الهلالي و الصخري لانهم يجوز فيهم اهمال الصدر وتوحيد العجز
اما باقي البحور فالقصيده لازم يكون لها قافيتين موحده لصدر والعجز
وردك موجود بصفحتي فوق يوم سألتك عن البحور اللي يجوز فيها الاهمال
اللي فهمته من اجابتك السابقه
انه يجوز في اي بحر من البحور
الاهمال لقافية الصدر وتكون على نفس نسق
ابيات الشاعر اعلاه
يعني اول بيت الصدر والعجز موحده القافيه
بعدين في باقي الابيات يهمل الصدر وتبقى قافية العجز موحده في جميع الابيات
مثل هالابيات من عندي
إلا انت لاتزعل تراني دخيلك=لامن زعلت شلون اقدر اجيلك
لا لا تكبّر او تناسى رفيقن=لو تلعب بناره يطفّي فتيلك
ياما وياما قد تحمّل لعينك=وانته فعينه ساكنن مايشيلك
هذي على المسحوب
بانتظارك استاذتي
والله يعطيك الف عافيه
مرحبا
صح السانك ابيات جميله
توجد هذه الصور ولكنها مبتكره
واي شيء ياحسين تستقر عليه الذائقه الشعريه وتستسيغه فهو جميل
كتبت بهذه الطريقه على كم بحر
وكتبت على كل البحور حتى المهجور منها نبطيا قبل ان اتعلم العروض
وبعد ماتعلمت كتبت بأوزان مختلفه على نفس البحر
يجوز تطور
وماكتبته يعتتبر مطور
ابدع فليس للابداع حدود
قد تجد من يعترض طريقك ويقول: لم يكتبو ها الاجداد
وطالما هو جميل
لن يضر الشعر اذا طورناه وابدعنا
والى الامام
ودمت بخير
أنا ويّاه حالتنا غريبه=عجزت افهمه يامصعب وصوفه
أحسّ انّي كذا أبغى أسيبه=وابغى فرقته مابغى اشوفه
ويجيني بسّ مدري وش يجيبه=وتملكني رغم انفي طيوفه
اصدُّ وخافقي يا ناس عيبه=اذا شاف الغضي ابدا النكوفه
سرق قلبي نهب عقلي نهيبه=وروحي صارت لحبه عكوفه
تجيبه قصة الفرقا عجيبه=ويجيني غصب ابروحن شغوفه
فراقه كان في عيني مصيبه=وهذا حال هالدهر وصروفه
كفاني بس اجروحن عطيبه=فقلبي دايمن حوله تحوفه
وقلبي عاف يامهند طبيبه=وعاف الحبِّ مايبغى هنوفه
مُريبه حالتي والله مريبه=كأنّي مثل ناصر في بروفه
امثّلها بأدورن صعيبه=ودورن جاز لي واخر اعوفه
ألا ليته يجيني واغديبه=ويحسّ بلهفة القلب وشفوفه
ويسمع بسّ معلوق يحكيبه=بأنغام الهوى واحلى هتوفه
يشوف انهار عيني له سكيبه=ويحس بحرقة الدمع وجروفه
عرفت الطيب منه وفيه طيبه=والى منّي مدحته ياكسوفه
انا محتار فيه وفي مغيبه=ألا وشلون يرحل ياحسوفه
احبّه ياعرب ماطعم زبيبه=ليا منّه نهرني ياحروفه
تذوّبني واحسّ انّي اهيبه=واتمتم تمّ واسمع ضحك جوفه
يالبّى ضحكته لا جت غصيبه=على قلبي عسل لا ماتطوفه
وانا من لامني جعله يصيبه=هوى ريمٍ تعلّه ماتروفه
سعيد وحالتي والله كئيبه=سبايب قسوة الزّين وظروفه
ابيه وحالتي والله غريبه=وقلبي صارت الحيره ضيوفه
والا ياليته لحظّي نصيبه=واشبّكها كفوفي مع كفوفه
مراحب حسين
كيفك ياشاعر منتدانا الرهيب
عساك بخير
صح السانك القصيده اعلاه روعه على بحر الصخر يسلم قلبك
حسين
في رد لسؤالك عن البحور اللي يجوز فيها اختلاف القاف
لقيت جوابي
عيد قراءته
اهمال القافيه فقط بالصدر
الصخري .. والهلالي ..
ثم استرسلت
وعموما ماتجود به القريحه لايخذلك ابدا ودائما يأتي رائع ولن تأتي قريحة شاعر بما لايطيب للسامعين .. الا اذا كان يستشعر
يستشعر = ينظم بدون قريحه
واجمل الشعر ماكتب في اوانه واوانه عنما تكون المشاعر متأججه لحدث ما
ودمت بخير
حزين القلب ودموعي تهلّـي=امنّي خاطري وابكي واصلّـي
واقول اليوم خلّي وش محلّي=تعبت ارجوك تكفى بس قلّي
عشقتك عشق واضح ومتجلّي=على وضح النقا ساكن بكلّـي
من الخفّاق شوقك لي يتلّـي=وإذا تلّي اهلّـي ثـم اهلّـي
يسافر بي وانا قاعد في حلّي=لعندك ياهوى روحي ياخلّـي
ابـد والله منّـك مـا املّـي=لو اني جانبـك ملّـي بملّـي
سَأًلْتُ الله يَـاْ بَـدراً يُسلّـي=سِلوانـاً ببعـدك لِـيْ لَعَلّـي
اتحمل غيابك وارضى باللّـي=قسمه الله يا لُغـزي وحَلّـي
بسعيك سوف اسعى لتخلّـي=وإلا عزتي مارضـى تُذَلّـي
لَعَمرك كيف تهجرُ من يُعَلّـي=بقدرك في الحنايا كيف قُلّي ؟!
هذه قصيده ليست بجديده
كانت اثناء تعلمي العروض
واريد ملاحظاتك
استاذه ناديه وبدقه
قبل ان ادلي بما لدي
كل الود
هلا استاذ حسين
هذي على الصخري
3 4 3 4 3 2
صح السانك
سَأًلْتُ الله يَـاْ بَـدراً يُسلّـي
سِلوانـاً ببعـدك لِـيْ لَعَلّـي
اتحمل غيابك وارضى باللّـي
قسمه الله يا لُغـزي وحَلّـي
بسعيك سوف اسعى للتخلّـي
وإلا عزتي مارضـى تُذَلّـي
زدت لك لام بكلمة (لتخلي) اكيد خطأ كيبوردي
لو تكرمت قطع اللي باللون الاحمر .. ودمت بخير
أخي حسين
إضافة إلى ملاحظات الأستاذة
لعل من الأصوب عندما تكون كافة الأشطر لها نفس الوزن والقافية ـ أن تكتب على النحو التالي أسوة بالفصيح ( مشطور الصخري ) يعني كل شطر بيت مستقل.
حزين القلب ودموعي تهلّـي
امنّي خاطري وابكي واصلّـي
واقول اليوم خلّي وش محلّي
تعبت ارجوك تكفى بس قلّـي
عشقتك عشق واضح ومتجلّي
على وضح النقا ساكن بكلّـي
ما أدري رأيك ورأي الأستاذة والمشاركين الكرام . وهل مرت بكم قصيدة نبطية لنهايتي شطريها نفس الوزن والقافية ؟
يرعاكم الله.
نعم تصير وقرأت لبعض الشعراء
ولكن لا يمدحونها
بسبب : تكون الرنة الموسيقيه غير مستحبه
والله اعلم ..
عذرا اخ حسين بس حبيت اشارك
وصح لسانك على القصائد الجميله والراقيه
عاطر التحايا
الذين يشاهدون الموضوع الآن: 1 (0 من الأعضاء و 1 زائر)
المفضلات