بحر الهلالي

يا ركب يا مترحلين رحايل= علاكيم كومٍ كاالعياد النحايل
حرايرٍتطوي الفيافي متونها=امناك يا ناوي تزور الخلايل
وساع مرافقهن جلال عضودهن=بتر الفخوذ مربعات الثمايل
هضع الرقاب وغرب يا كن وصفها=عكف السيوف المدبحات السلايل
سخاف المذارع ناحلات من العنا=ومن كثر سوباع الصفر والقوايل
قد عانسن سواجة السير والسرا=وليل عنا برده ضرير وهايل
خذن في ربيع الحبل ستين ليلةٍ=في جود وسميٍ قفته المخايل
لاظمها الراعي ولا صاعها الفحل=ترعا زماليق الحيا والجلاليل
لين اتسن لي واستون لي على الهوى=وبدا لازم ما عنه عذر وحايل
ركبوهن اللي ضارينٍ على الخلا= مداغيش ربع وافين الخصايل
ويا ركب عوجوا بالنضا وقم ساعةٍ= باقوم واكتب للعسيري مثايل
ومن عقب ذا ياركب في امانة الذي=ما غير حكمه طايل كل طايل
تنحروا بيت الوفا مبعد الجفا=بيت الثنا والحمد من عصر وايل
والى لفيتوا وجه ربعه ودنوته=الحيد شيال الحمول الثقايل
والله ما لومه ولا نيب ناقده= يومه يسب الوقت ويقول مايل
ويقول لي يا فلان لجواد كملوا=وما عاد من لجواد الا القلايل
ذهبوا يا بن راشد مناعير وقتنا= وقبورهم بين النصايب نثايل
لكنني با قول يا كاسب الثنا=ماحن يا شاهين الا قبايل
ومالطيب الا كاالسلف عند صاحبه=ولا ذخر الا في عيال الحمايل
لحا الله من لا ينفع الطيب عندهم=ومن لا يجازي في الحسان الجمايل
والى شفت في لجواد تاتي خلايفٍ=ترا كل تمر فيه حشوا ودايل
وذي رادة الله ربنا جل شانه=فكر بخلقه يا العسيري وخايل
لو كان من راد العلا يدراك العلا=كان المناوي كسبت كل فايل
ولولا ردي وجيد فعله انفرق=ما كان بين الناس فرق ونفايل
رجل كما نجم تقدا به السرا=بر وبحر وللسرا في النوايل
عقاد راي الوفد لاجات حجه=حبال ما تغباعليه الحبايل
ورجل طويل الباع قد هو مجربٍ=عطاياه من مد الولي له جزايل
حماي في ثار ابن عمه وجيرته=يامن به الوالي عروض الحلايل
ورجل يحب المال والمال غايته=وهوايته لم الذهب والحوايل
لا لذ له زاد ولا لذ له كرا=ولا يدري ان المال والعمر زايل
ورجل ضعيف القلب ما فيه حيلةٍ=لا مثرٍقدره ولا عنه سايل
همه هبابه عند مشطه وذروته=وهذا نعده من بنات العوايل
ورجل تسنعه المره عند شورها=وتحاكمه ظلم بليا دلايل
وتعاتب المسكين بامه ووالده=وتعيله لو كان ما هوب عايل
ويا بن سعد ما نيب قفاي ساقه=ذي قسمة اللي خصهم بالفضايل
فضل مرازقهم وحدد عمارهم=وكل حسابه بالعمل والفعايل

الابيات للشاعر المرحوم محمد بن راشد بن مهنا النعيمي