هذه بعامية بلادي كتبتها قبل 5 سنوات او يزيد
مخلوقة او مرسومة
مخلوقة زي رسمة
صوتها زي نسمة
بتغني للعشاق وتمسح الاحزان
عيونها زي طرحة
بتغطي كوم احزان
قليبها زي دكان
يبيع الفرح بالدين
ايديها لو مرة
ضمت في يوم ايديك
عينيها لو مرة
باست في يوم عينيك
ترفرف عليك حاجات
ريحة ورد فرحان
صورة قمر بضحك
ضحكت طفل نعسان
مستني بس حضنك
و يصبح معاك انسان
--
نمت في حضنك
كنت زي خايف
خايف اكون حبيت
متمني لو جنيت
من قبل ما القاك
ماشيه جنب البيت
شايله الفرح كيمان
شايلاني في عيونك
شايلاني زي صورة
صورة مرسومة
وباهتة الالوان
فاكرة يوم كنا اثنيين و ما اثنيين
و قلتي لي يلا نبين الالوان
يا ريتني لو كنت شاعر او فنان
و كتبت في عيونك اروع الاشعار
دندنت في حضنك اجمل الالحان
و رسمة لي لوحة
لوحة زي طاقة
فاتحة في قلبك
و انتي في الشارع
بتبيعي في الفرحة
و بتقولي لي يلا
نترجم الفرحة
لقيتها يوم واقفة
فاتحة ايديها
نايمة عينيها
بتغني في غنوة
غنوة من قصة قصة في دفتر
دفتر كبير احمر
احترت فيك و الله
قولي لي يلا
مخلوقة او مرسومة
قالت لي عينيها
مخلوقة زي رسمة
مرسومة في قلبك
و مكتوب تكون حبك
