-لما يجينى الشعر يخبط
مش هاسمح له
إنه يغنى أشعاره لغيرك
ولا هاسمح له
إنه يقول لك يوم حواديتى
إنى بعدى ف مركب قلبى
بحر الشوق
وافرد للكلمة شراعى
واترك للشعرالدفة
ويودينى لشطك وحدك
واسمع همسك وسط الطير
ملعون الشعر
بيجيب الدنيا لحد الروح
ويفتح جوايا جروح
كانت دبلانة
كانت ندمانة زمان
ياجروحى ..
وآلامى وحزنى
بكتب ليكى
دا انا خواف من بوح السر
وبخاف لأروح يوم
قلبى يهاجر لحظة الحس
ولايقواش
على حواديت الليل الباردة
لما تخبط على أبوابه
وما يلقاش
غير ذكرى تلف عليه كالقمرة
بس ف وسط غيوم
ياحبيبتى ...
الحب دا سر الروح
مش بس نبوح
وليالى طويلة بتجرى دموعنا الهربانة
ولانلعن إيد البعد الساكن بينا
ماتخلى العطر ف حضن القلب
بيحس بأمن ويبطل أن
وكفاية علينا الشعر
بيخبط قلبى
وبياخد كل حروفك منى
وينادى باسمك
دمعة فرحة واقفة بعيد
مش بتقرب
إلا إليكى
ما هو لو كان للفرح بيوت
كان يسكن جوة عنيكى
