قطـــار العمـــر
يا قطار العمر وقف لاتروح=طال مشواري وقلبي ينتظر
أحسب الخطوات بدروبي جروح=كل خطوة جرح ونيران وجمر
مل قلبي من البكا دايم ينوح=وإن نخيته زادني هم وقهر
أحفر الآمال وأبني لي صروح=كلها قوة مع عزوم وصبر
وأرجي شمسي مير ما إلها وضوح=طال ليلي طال واضناني السهر
ليه يادنيـا ابـو وجـهٍ سمـوح=غاب وخلاني بلا شمـس وقمـر
بعد ما عطره على كفـي يفـوح=راح ما سلـم ولا حتـى اعتـذر
مالقيـت بغيبتـه وجـهٍ صبـوح=مابقى لي غيـر انفـاس العطـر
انخرس صوتي ولا أقـدر أبـوح=يوم جسمه صار بأحضـان القبـر
وانتحر حلمي على ذيك السفـوح=طاحت اجبالـي وعـودي انكسـر
والفرح عقبه جفا دربي شحـوح=لاسحابـة ارتـوي منهـا مطـر
لا ولا حتـى سـراب لـي يلـوح=اسبره واملـى عيونـي بالنظـر
يالله بعفـوك كريـم يـا صفـوح=اكفنـي يـارب تصاريـف القـدر
واملى قلبي من رضاك وصبر نوح=واكفني من شر ضيمـات الدهـر
